Babban Sufeton ’Yan Sandan Najeriya, Olatunji Disu, ya bayar da umarnin hana jami’an rundunar yin hira, bidiyo ko wallafa wasu abubuwan da suka shafi aikin ’yan sanda a kafafen sada zumunta ba tare da izini daga hukumomin da suka dace ba.
A wata takarda mai dauke da kwanan watan 22 ga Yuni, Sufeton ya bayyana cewa an haramta wa jami’an ’yan sanda kirkirar bidiyo ko shirye-shiryen nishadi domin samun kudaden shiga ta kafafen sada zumunta kamar TikTok, Facebook, Instagram da YouTube, musamman idan suna sanye da kayan aiki na rundunar ko suna cikin ofisoshin ’yan sanda.
Ya gargadi cewa duk jami’in da aka samu da karya wannan umarni zai fuskanci matakan ladabtarwa da suka hada da dakatar da albashi, rage matsayi, kora daga aiki, ko kuma gurfanar da shi a gaban kotu gwargwadon laifin da ya aikata.
Haka kuma, umarnin ya hana jami’an yin tsokaci a kafafen sada zumunta kan harkokin cikin gida na rundunar, da suka hada da bincike, horo, canja wurin aiki da sauran muhimman ayyukan ’yan sanda.
Sufeton ya kuma hana jami’an karbar tallafi ko yin tallan kamfanoni da sunan rundunar ’yan sanda ba tare da sahalewar hukumomi ba.
Domin tabbatar da bin wannan sabon tsari, an dorawa kwamishinonin ’yan sanda, kwamandoji da jami’an DPO alhakin sa ido kan jami’ansu. Ya ce duk shugaban da ya gaza sanya ido ko bayar da rahoton keta wannan doka zai iya fuskantar hukuncin dakatarwa ko rage matsayi.
Bugu da kari, Sashen FIB da X-Squad na rundunar za su ci gaba da sanya ido a kafafen sada zumunta domin gano jami’an da suka karya wannan umarni.
Sufeton ’yan sandan ya jaddada cewa wannan umarni ya fara aiki nan take a dukkan rundunonin ’yan sanda da ke fadin Najeriya.