Babbar Kotun Tarayya da ke zamanta a Jihar Gombe ta soke tsarin da aka bi wajen tsayar da Farfesa Isa Ali Ibrahim Pantami a matsayin ɗan takarar Jam’iyyar PDP na kujerar Gwamnan Jihar Gombe a zaɓen 2027.
Kotun ta kuma umarci Jam’iyyar PDP da ta gudanar da sabon zaɓen fidda gwani, tare da bin ƙa’idojin jam’iyyar da kuma tanade-tanaden dokokin zaɓe da suka dace.
Mai Shari’a Amina Aliyu Mohammed ce ta bayar da umarnin a ranar Alhamis, yayin da take yanke hukunci kan ƙarar da wani mai neman tikitin gwamna a PDP, Usman Aliyu Garry, ya shigar yana ƙalubalantar tsarin da ya kai ga tsayar da Pantami a matsayin ɗan takarar jam’iyyar.
Garry ya nemi kotun da ta soke zaɓen Pantami, yana mai cewa PDP ba ta gudanar da ingantaccen zaɓen fidda gwani ba, bisa tanade-tanaden kundin tsarin mulkin jam’iyyar da kuma dokokin zaɓe.
A hukuncin da ta yanke, kotun ta umarci PDP da ta sake gudanar da zaɓen fidda gwani na gwamna, tare da tabbatar da cewa an bi dukkan ƙa’idojin da doka da kundin tsarin jam’iyyar suka tanada.
Hukuncin ya biyo bayan dage shari’ar tun watan Yuli, bayan lauyoyin ɓangarorin da abin ya shafa sun gabatar da hujjoji da rubuce-rubucensu na ƙarshe a gaban kotun.
Pantami, wanda ya taɓa zama Ministan Sadarwa da Tattalin Arzikin Zamani, ya fice daga Jam’iyyar APC zuwa PDP ne bayan APC ta tsayar da Jamilu Gwamna a matsayin ɗan takararta na gwamnan Jihar Gombe a zaɓen 2027.
Sai dai, Jam’iyyar PDP da Pantami sun ƙalubalanci ƙarar. Lauyan Pantami ya bayyana cewa wanda yake karewa ya fice daga APC ne a ranar 19 ga Mayun 2026, kafin ya shiga tsarin zaɓen fidda gwani na PDP.
A nata ɓangaren, PDP ta roƙi kotun da ta yi watsi da ƙarar da aka shigar.
Sai dai hukuncin kotun ya umarci jam’iyyar da ta sake gudanar da zaɓen fidda gwani, bisa bin tanade-tanaden dokokin jam’iyyar da dokokin zaɓe.