An gudanar da wata gasa ta musamman ta shan koko a unguwar Tukuntawa da ke ƙaramar hukumar Birni, inda aka ce an dama kimanin buhun gero guda domin gudanar da gasar.
Wasu matasa ne suka shirya gasar da nufin bunƙasa al’adun Hausawa tare da ƙara wayar da kai kan muhimmancin abincin gargajiya a tsakanin al’umma.
Masu shirya taron sun bayyana cewa koko na daga cikin tsofaffin abincin Hausawa da ke da matuƙar muhimmanci wajen samar da kuzari da kuma kiyaye al’adun gargajiya.
A yayin gasar, mahalarta daga sassa daban-daban sun taru domin nuna bajinta wajen shan koko tare da nishaɗi da walwala.
Matasan sun kuma yi kira ga United Nations Majalisar Ɗinkin Duniya da ta ware wata rana ta musamman domin bikin “Ranar Shan Koko ta Duniya,” domin ƙara fito da al’adun Hausawa a idon duniya.
Wasu daga cikin mahalarta taron sun bayyana cewa irin waɗannan shirye-shirye na taimakawa wajen haɗa kan matasa da kuma farfaɗo da al’adun gargajiya da ke neman gushewa.