Daga Brown Pigeon Media
Kwamishinan Yaɗa Labarai da Harkokin Cikin Gida na Jihar Kano, Kwamared Ibrahim Abdullahi Waiya, ya karɓi jagorori da mambobin Ƙungiyar Tsofaffin Zaɓaɓɓun Shugabannin Ƙananan Hukumomi da Kansiloli daga ƙananan hukumomi 44 na jihar Kano, waɗanda suka yi aiki a tsakanin shekarun 1997 zuwa 1998, a wata ziyarar nuna goyon baya da suka kai masa a ofishinsa domin nuna goyon baya ga gwamnatin Mai Girma Gwamnan Jihar Kano, Alhaji Abba Kabir Yusuf.
A yayin ganawar, Kwamared Waiya ya bayyana cewa waɗannan tsofaffin shugabanni fitattun jagorori ne da suka taka muhimmiyar rawa wajen gina dimokuraɗiyya da bunƙasa siyasa a matakin ƙaramar hukuma, jiha da ma ƙasa baki ɗaya. Ya ce kwarewarsu, tasirinsu a siyasa da kusancinsu da al’umma na ci gaba da zama ginshiƙi wajen ci gaban jihar Kano da ƙarfafa tsarin dimokuraɗiyya.
A nasu jawabin, jagororin ƙungiyar sun sake jaddada cikakken goyon bayansu ga gwamnatin Mai Girma Gwamna, Alhaji Abba Kabir Yusuf, tare da alƙawarin ci gaba da wayar da kan al’umma da mara wa manufofi da shirye-shiryen gwamnati baya domin amfanin al’ummar jihar Kano.
Kwamared Waiya ya nuna matuƙar godiyarsa bisa wannan ziyara da kuma goyon bayan da suka nuna wa gwamnatin jihar. Ya tabbatar musu da cewa zai ci gaba da ba su gudummawar da ta dace tare da aiki kafada da kafada da su domin ƙara ƙarfafa nasarorin gwamnatin Kano.
Har ila yau, ƙungiyar ta roƙi Mai Girma Gwamnan Jihar Kano da ya duba hakkokinsu kamar yadda aka yi wa sauran waɗanda suka taɓa riƙe makamantan mukamai.
A matsayin nuna godiya ga irin gudummawar da suka bayar da kuma ci gaba da nuna biyayyarsu ga gwamnati, Kwamared Ibrahim Abdullahi Waiya ya ba ƙungiyar tallafin Naira miliyan uku (₦3,000,000).
Ya kuma yi alƙawarin miƙa sauran buƙatunsu ga Mai Girma Gwamna domin ya duba su yadda ya dace.
Ya jaddada cewa da haɗin kai, mutunta juna da aiki tare tsakanin gwamnati da masu ruwa da tsaki, za a ci gaba da ƙarfafa dimokuraɗiyya da samar da ci gaba mai ɗorewa a Jihar Kano.