Daga Brown Pigeon Media
Masana a harkar man fetur sun bayyana cewa farashin litar fetur (PMS) a Najeriya na iya sauka zuwa kusan naira 900 idan har shirin sulhu tsakanin Amurka da Iran ya tabbata tare da ci gaba da faduwar farashin danyen mai a kasuwannin duniya.
Rahotanni sun nuna cewa farashin danyen mai ya sauka daga sama da dala 120 kan ganga a watan Afrilu zuwa kusan dala 87 a halin yanzu. Masana sun danganta wannan sauyi da raguwar zaman dar-dar da ya dabaibaye yankin Gabas ta Tsakiya, wanda ya taimaka wajen kwantar da hankulan masu zuba jari da ‘yan kasuwar makamashi.
Masu ruwa da tsaki a bangaren man fetur sun ce idan farashin danyen mai ya ci gaba da raguwa, tare da yiwuwar sake bude mashigin ruwa na Hormuz, hakan na iya haifar da karin saukin farashin fetur, dizal da kuma man jiragen sama a kasuwannin duniya da na Najeriya.
A baya dai, rikicin da ya barke tsakanin Amurka da Iran ya haddasa tashin gwauron zabo a farashin danyen mai, inda ya haura dala 100 kan ganga, har ma ya kai sama da dala 120 a wasu lokuta. Wannan lamari ya yi tasiri kai tsaye kan farashin makamashi a sassa daban-daban na duniya.
A Najeriya kuwa, farashin fetur ya tashi daga kusan naira 830 zuwa sama da naira 1,300 kan kowace lita a wasu wurare, yayin da farashin dizal da man jiragen sama su ma suka yi tashin gwauron zabo.
Kano first
Wata majiya daga Matatar Dangote, wadda ta nemi a sakaya sunanta, ta bayyana cewa akwai yiwuwar farashin fetur ya sauka zuwa kusan naira 900 kan kowace lita idan farashin danyen mai ya ci gaba da raguwa a kasuwannin duniya.
Majiyar ta ce duk da wannan hasashe, har yanzu matatar tana da tarin danyen man da aka saya a lokacin da farashinsa ya yi tsada, lamarin da ka iya jinkirta rage farashin fetur cikin gaggawa.
“Farashin fetur na iya kaiwa naira 900 kan kowace lita idan farashin mai ya ci gaba da sauka a kasuwannin duniya. Sai dai har yanzu muna da danyen man da aka saya da tsada,” in ji majiyar.
Masana sun kara da cewa idan yarjejeniyar sulhu tsakanin Amurka da Iran ta samu nasara, aka sake bude mashigin Hormuz tare da daidaituwar kasuwar danyen mai, akwai yiwuwar farashin fetur a Najeriya ya ci gaba da raguwa a watanni masu zuwa, wanda hakan zai rage wa ‘yan kasa nauyin tsadar makamashi da sufuri.