Kwamishinan Yaɗa Labarai da Harkokin Cikin Gida na Jihar Kano, Kwamared Ibrahim Abdullahi Waiya, ya kafa wata Majalisar Matasan da ke da alaƙa da harkar daba, da nufin samar da hanyoyin sasanta rikice-rikice da kawo ƙarshen matsalar fadan daba a faɗin jihar.
An kafa majalisar ne domin haɗa kai da matasan da abin ya shafa, tare da samar da wata kafa ta tattaunawa, fahimtar juna da sulhu, domin dakile tashe-tashen hankula da rikice-rikicen da ke faruwa tsakanin ƙungiyoyin matasa.
Majalisar za ta kasance ƙarƙashin jagorancin Malam Abdullahi, wanda zai jagoranci ayyukanta tare da sauran shugabannin da aka zaɓa, domin tabbatar da cimma manufofin da aka kafa majalisar a kansu.
Haka kuma, an kafa kwamitoci daban-daban da za su mayar da hankali kan fannoni daban-daban na matsalar daba, ciki har da gano musabbabin rikice-rikicen matasa da samar da hanyoyin magance su tun daga tushe.
Kwamitocin za su kuma mayar da hankali wajen sasanta rikice-rikice tsakanin ƙungiyoyin matasa, wayar da kan matasa game da illolin daba, da kuma haɗin gwiwa da hukumomin tsaro da sauran masu ruwa da tsaki wajen tabbatar da zaman lafiya.
Da yake bayyana manufar kafa majalisar, Kwamared Ibrahim Abdullahi Waiya ya ce gwamnatin Jihar Kano ta himmatu wajen tabbatar da zaman lafiya da tsaro a faɗin jihar, musamman ganin yadda matsalar daba ke haifar da asarar rayuka da dukiyoyi a wasu yankunan jihar.
Kwamishinan ya bayyana cewa gwamnatin jihar za ta yi aiki kafada da kafada da sabbin shugabannin da kwamitocin da aka kafa domin samar da ingantattun hanyoyin magance matsalar daba da kuma kawo ƙarshen rikice-rikicen matasa a Kano.
Ya kuma yi kira ga matasa da su rungumi zaman lafiya tare da kauce wa duk wani abu da ka iya haddasa tashin hankali, yana mai jaddada cewa haɗin kan gwamnati, matasa da al’umma shi ne ginshiƙin samun nasarar yaki da matsalar daba.
Kwamared Waiya ya ce ta hanyar tattaunawa, sulhu, wayar da kai da haɗin gwiwa tsakanin gwamnati da matasa, za a iya samar da mafita mai ɗorewa da za ta taimaka wajen tabbatar da zaman lafiya da tsaro a Jihar Kano.