Ƙungiyar ƙwadago ta Najeriya, Nigeria Labour Congress (NLC), ta yi watsi da shawarar da wasu gwamnoni suka gabatar na ƙara mafi ƙarancin albashi zuwa Naira 100,000, tana mai cewa adadin bai dace da halin matsin tattalin arziki da tsadar rayuwa da ake fama da ita a ƙasar ba.
Kakakin ƙungiyar, Benson Upah, ya bayyana cewa Naira 100,000 ba za ta iya biyan buƙatun ma’aikata ba a halin yanzu, yana mai jaddada cewa mafi ƙarancin albashi ya kamata ya kai Naira miliyan ɗaya domin ya dace da hauhawar farashin kayayyaki da tsadar rayuwa.
Upah ya ce ma’aikatan Najeriya na fuskantar ƙalubale masu yawa sakamakon hauhawar farashin abinci, sufuri, gidaje da sauran muhimman buƙatun rayuwa, lamarin da ke sa albashin da ake magana a kai ya zama ƙasa da abin da ake buƙata.
Wannan matsaya ta NLC na zuwa ne bayan wasu rahotanni da suka nuna cewa Ƙungiyar Gwamnonin Najeriya (NGF) ƙarƙashin jagorancin AbdulRahman AbdulRazaq ta buƙaci a yi la’akari da ƙara mafi ƙarancin albashi zuwa Naira 100,000.
Batun sabon mafi ƙarancin albashi na ci gaba da jan hankali a faɗin ƙasar, yayin da ma’aikata da gwamnati ke ci gaba da tattaunawa kan hanyar da za a bi wajen inganta walwalar ma’aikata ba tare da haifar da ƙarin nauyi ga tattalin arziki ba.
Masana na sa ran wannan sabon kira da NLC ta yi zai ƙara ɗora batun albashi a gaba wajen muhawarar siyasa da tattalin arziki a Najeriya.