Babbar Alkalin Alkalai ta Najeriya (CJN), Mai Shari’a Kudirat Kekere-Ekun, ta umarci dukkan lauyoyi, ma’aikatan kotu da sauran masu hulɗa da harkokin shari’a su daina amfani da lakabin “Barrister” a gaban sunayensu a duk wata hulɗa ta hukuma da Kotun Koli.
Umarnin na kunshe ne cikin wata takarda mai kwanan watan 13 ga Yuli, 2026, wadda Babban Magatakardan Kotun Koli, Kabir Akanbi, ya sanya wa hannu.
A cewar sanarwar, amfani da lakabin “Barrister” a matsayin gaban suna bai dace da ƙa’idojin ƙwarewa da ɗabi’ar aikin shari’a da ake buƙata a Kotun Koli ba.
Saboda haka, an umurci dukkan waɗanda abin ya shafa da su daina amfani da wannan lakabi a cikin wasiƙun hukuma, takardun aiki, bayanan hukuma, katunan shaida da duk wasu mu’amalolin hukuma, kuma umarnin ya fara aiki nan take.
Haka kuma, an umarci shugabannin sassa da na rassa da su tabbatar da cewa duk ma’aikatan da ke ƙarƙashinsu sun bi wannan umarni ba tare da saba wa ba.
Wannan mataki na zuwa ne bayan Majalisar Ilimin Shari’a ta Najeriya ta gargadi masu shirin shiga aikin lauya da kada su sanya wig da rigar kotu ko kuma su gabatar da kansu a matsayin cikakkun lauyoyi kafin a rantsar da su a Hukumar Lauyoyin Najeriya (Nigerian Bar).
Majalisar ta bayyana cewa yin hakan na tauye martabar sana’ar lauya, tare da gargaɗin cewa duk wanda ya karya wannan ƙa’ida na iya fuskantar matakan ladabtarwa.